រាជធានីភ្នំពេញ៖ ថ្ងៃចន្ទ ១៤រោច ខែបុស្ស ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៧ ខែមករា ឆ្នាំ២០២៥ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល និងប្រតិភូក្រសួងសុខាភិបាល បានអញ្ជើញគោរពវិញ្ញាណក្ខន្ធ ឧបាសិកា កែវ ស្រង៉ាត់ ដែលត្រូវជាភរិយា ឯកឧត្តមសាស្រ្តាចារ្យ យូ គឹមយាន អតីតទីប្រឹក្សាក្រសួងសុខាភិបាល បានទទួលមរណភាព កាលពីវេលាម៉ោង ១១:៣០នាទីយប់ នៅថ្ងៃសុក្រ ១១រោច ខែបុស្ស ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៤ ខែមករា ឆ្នាំ២០២៥ ក្នុងជន្មាយុ ៩៣ឆ្នាំ ដោយជរាពាធ។
ក្នុងឱកាសប្រកបដោយសមានទុក្ខដ៏ក្រៀមក្រំក្រៃលែងនេះ ក្នុងនាមថ្នាក់ដឹកនាំ មន្រ្តីរាជការ ព្រមទាំងបុគ្គលិក នៃក្រសួងសុខាភិបាលទាំងអស់ សូមចូលរួមរំលែកទុក្ខ និងសោកស្តាយស្រណោះអាឡោះអាល័យ ចំពោះមរណភាព ឧបាសិកា កែវ ស្រង៉ាត់ និងសូមឧទ្ទិសបួងសួងដល់ដួងវិញ្ញាណក្ខន្ធ ឧបាសិកា កែវ ស្រង៉ាត់ សូមឆាប់បានចាប់កំណើតក្នុងសុគតិភព គ្រប់ៗជាតិកុំបីឃ្លៀងឃ្លាតឡើយ។
