ខេត្តកំពត៖ ថ្ងៃចន្ទ ១២រោច ខែមាឃ ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី២៤ ខែកុម្ភៈ ឆ្នាំ២០២៥ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមសាស្រ្តាចារ្យ ឈាង រ៉ា រដ្ឋមន្ត្រីក្រសួងសុខាភិបាល ឯកឧត្តមវេជ្ជបណ្ឌិត ឡូ វាសនាគីរី រដ្ឋលេខាធិការ នៃក្រសួងសុខាភិបាល និងជាប្រធានគ្រប់គ្រងគម្រោងលើកកម្ពស់គុណភាព និងសមធម៌សុខាភិបាល ដំណាក់កាលទី២ (H-EQIP 2) បានអញ្ជើញចូលរួមជាគណៈអធិបតី ក្នុងពិធីបើកវគ្គបណ្តុះបណ្តាលគ្រូបង្គោល ស្តីពីការសរសេរនីតិវិធីប្រតិបត្តិស្តង់ដា (SOP) សម្រាប់ស្តង់ដាទទួលស្គាល់គុណភាពសេវាមណ្ឌលសុខភាព។
វគ្គបណ្តុះបណ្តាលនេះផ្តោតលើអ្នកវាយតម្លៃថ្នាក់ការិយាល័យស្រុកប្រតិបត្តិ ចំនួន៥២ មកពីទូទាំង ២៥ រាជធានី ខេត្ត ក្នុងការរៀបចំសរសេរនីតិវិធីប្រតិបត្តិស្តង់ដា (SOP) ដើម្បីបំពេញទៅតាមស្តង់ដាទទួលស្គាល់គុណភាពសេវា មណ្ឌលសុខភាព និងជម្រុញនូវការអនុវត្តការងារប្រកបដោយគុណភាព សុវត្ថិភាព និងប្រសិទ្ធខ្ពស់។ សិក្ខាកាមដែលបានចូលរួម ក្នុងវគ្គបណ្តុះបណ្តាលនេះ នឹងត្រូវណែនាំបង្រៀនបន្តដល់មណ្ឌលសុខភាព នៅក្នុងការិយាល័យស្រុកប្រតិបត្តិរបស់ខ្លួន ក្នុងការកែសម្រួលនីតិវិធីប្រតិបត្តិស្តង់ដានានាឱ្យសមស្របតាមបរិបទ និងធនធានរបស់មណ្ឌលសុខភាពរៀងៗខ្លួន។
វគ្គបណ្តុះបណ្តាលនេះ ក្រុមការងារបានរៀបចំនីតិវិធីប្រតិបត្តិស្តង់ដា (SOP) ចំនួន១៣ ពីក្នុងក្រុមស្តង់ដា៖ ១- ការបង្ការនិងការត្រួតពិនិត្យការចម្លងរោគ ២-ការគ្រប់គ្រងធនធានមនុស្ស ៣-សេវាថែទាំអ្នកជំងឺ ៤-ការគ្រប់គ្រងឱសថ និង ៥- បរិស្ថានសុវត្ថិភាពនិងសន្តិសុខមណ្ឌលសុខភាព។
សូមបញ្ជាក់ថាការវាយតម្លៃគុណភាពសេវាមណ្ឌលសុខភាពដោយប្រើប្រាស់សំណុំឧបករណ៍តាមដានការកែលម្អគុណភាពសេវាសុខាភិបាលថ្នាក់ជាតិ កម្រិត២ (NQEMT 2) បានធ្វើឡើងជារៀងរាល់ឆមាសចាប់ពីឆមាសទី២ ឆ្នាំ២០២៣ មកដល់បច្ចុប្បន្ននេះបាន៣ជុំរួចមកហើយ។ ចំណែកការវាយតម្លៃជុំទី៤នឹងប្រព្រឹត្តទៅនៅខែមីនា ឆ្នាំ២០២៥។ វគ្គបណ្តុះបណ្តាលនេះនឹងជួយជម្រុញឱ្យលទ្ធផលនៃការវាយតម្លៃនៅជុំបន្តបន្ទាប់មានការកើនឡើងនូវពិន្ទុផងដែរ។
សិក្ខាកាមចូលរួមក្នុងវគ្គបណ្តុះបណ្តាលនេះមានចំនួន ៧១នាក់ មកពីការិយាល័យស្រុកប្រតិបត្តិ ចំនួន៥២ និងគ្រូសម្របសម្រួលមកពីការិយាល័យធានាគុណភាព នាយកដ្ឋានមន្ទីរពេទ្យ នៃក្រសួងសុខាភិបាល។
