រាជធានីភ្នំពេញ៖ នៅថ្ងៃសុក្រ ២កើត ខែផល្គុន ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៨ ខែកុម្ភៈ ឆ្នាំ២០២៥ វេលាម៉ោង៨:៣០នាទី ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ឯកឧត្តមវេជ្ជបណ្ឌិត សាន់ សាប់អី រដ្ឋលេខាធិការក្រសួងសុខាភិបាល បានអញ្ជើញចូលរួមជាអធិបតីក្នុងពិធីបើកកិច្ចប្រជុំពិគ្រោះយោបល់បញ្ចប់លើនីតិវិធីប្រតិបត្តិ ក្រុមវេជ្ជសាស្រ្តសង្គ្រោះបន្ទាន់នៅកម្ពុជា។
កិច្ចប្រជុំពិគ្រោះយោបល់នេះមានគោលបំណងដើម្បីពិនិត្យ កែលម្អសេចក្តីព្រាងនីតិវិធីប្រតិបត្តិស្តង់ដាក្រុមវេជ្ជសាស្រ្តសង្គ្រោះបន្ទាន់កម្ពុជា ដើម្បីឆ្លើយតបពេលមានគ្រោះមហន្តរាយទ្រង់ទ្រាយធំ។
នៅក្នុងពិធីបើកកិច្ចប្រជុំឯកឧត្តមប្រធានបានមានប្រសាសន៍ថ្លែងអំណរគុណដល់នាយកដ្ឋានពាក់ព័ន្ធ មន្ទីរពេទ្យជាតិ មជ្ឈមណ្ឌលជាតិ អង្គការសុខភាពពិភពលោក ដែលបានចំណាយពេលវេលាមកចូលរួមកិច្ចប្រជុំពិគ្រោះយោបល់ដ៏មានសារៈសំខាន់នេះ។ បន្ទាប់មកឯកឧត្តមប្រធានអង្គប្រជុំបានណែនាំដល់ក្រុមការងារឱ្យពិនិត្យ និងពិគ្រោះយោបល់ ព្រមទាំងស្នើសុំមតិយោបល់ពីតំណាង មន្ទីរពេទ្យជាតិ មជ្ឈមណ្ឌលជាតិ និងអង្គការដៃគូរអភិវឌ្ឍន៍ នូវបទពិសោធន៍ល្អៗពីបណ្តាប្រទេសជឿនលឿន ដែលជាធាតុចូល ដើម្បីកែសម្រួលលើឯកសារនីតិវិធីស្តង់ដា ក្រុមវេជ្ជសាស្ត្រសង្គ្រោះបន្ទាន់កម្ពុជា ឱ្យកាន់តែមានភាពល្អស្របតាមបរិបទនាពេលបច្ចុប្បន្ន និងអាចអនុវត្តបានដោយមានប្រសិទ្ធភាពខ្ពស់ក្នុងការសង្គ្រោះជីវិតប្រជាជនកម្ពុជា។
សូមបញ្ជាក់ថា កិច្ចប្រជុំនេះ បានរៀបចំដោយនាយកដ្ឋានការពារសុខភាព នៃក្រសួងសុខាភិបាល សហការជាមួយអង្គការសុខភាពពិភពលោក ព្រមទាំងមានការចូលរួមនាយកដ្ឋានពាក់ព័ន្ធក្នុងទីស្តីការក្រសួងសុខាភិបាល ក្រុមគ្រូពេទ្យជំនាញពីបណ្តាមន្ទីរពេទ្យជាតិ រួមមានមន្ទីរពេទ្យកាល់ម៉ែត មន្ទីរពេទ្យមិត្តភាពខ្មែរ-សូវៀត មន្ទីរពេទ្យតេជោសន្តិភាព មន្ទីរពេទ្យមិត្តភាពកម្ពុជា-ចិនព្រះកុសុមៈ មន្ទីរពេទ្យកុមារជាតិ មន្ទីរពេទ្យព្រះអង្គឌួង មជ្ឈមណ្ឌលជាតិគាំពារមាតា និងទារក និងតំណាងអង្គការសុខភាពពិភពលោក សមាជិក ចូលរួមសរុបមានចំនួន៣២រូប។
