ទីក្រុងម៉ានីឡា ប្រទេសហ្វីលីពីន៖ នៅថ្ងៃសុក្រ ៧កើត ខែចេត្រ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី០៤ ខែមេសា ឆ្នាំ២០២៥ តំណាង ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល ឯកឧត្តមសាស្រ្តាចារ្យ កុយ វ៉ាន់នី រដ្ឋលេខាធិការ បានបន្តដឹកនាំគណៈប្រតិភូក្រសួងសុខាភិបាលចូលរួមកិច្ចប្រជុំកំពូលសកលថ្នាក់រដ្ឋមន្ត្រីលើកទី៧ អំពី «សុវត្ថិភាពអ្នកជំងឺ Patient Safety» សំរាប់ថ្ងៃទី២។
ប្រធានបទសំខាន់ នៃកិច្ចប្រជុំថ្ងៃទី២ បានពិនិត្យ និងពិភាក្សាចែករំលែកបទពិសោធន៍ផលចំណេញផ្នែកសេដ្ឋកិច្ច នៃការធ្វើរោគវិនិច្ឆ័យដោយសុវត្ថិភាព។ បន្ថែមលើនេះ មានការថ្លែងសារគន្លឹះរបស់តំណាង តំណាងធានាគារអភិវឌ្ឍន៍អាស៊ី និងឯកឧត្តម Dr Tedros Adhanom Ghebreyesus អគ្គលេខាធិការអង្គការសុខភាពពិភពលោក ស្តីពីការលើកកម្ពស់សុវត្ថិភាពអ្នកជំងឺ និងការគាំទ្រអនុវត្តផែនការសកម្មភាពសុវត្ថិភាពអ្នកជំងឺសកល ២០២១-២០៣០។
ជាលទ្ធផលអង្គប្រជុំក៏បានអនុម័តលើសេចក្តីថ្លែងការ Mandaluyong ស្តីពីសុវត្ថិភាពអ្នកជំងឺ (Mandaluyong Declaration on Patient Safety) ដែលខ្លឹមសារសង្ខេបចំនួន៤ចំណុច៖
១) ពង្រឹងកិច្ចសហការជាសកលដើម្បីសុវត្ថិភាពអ្នកជំងឺ (Strengthen Global Collaboration for Patient Safety)
២) លើកកម្ពស់ភាពជាអ្នកដឹកនាំ និងអភិបាលកិច្ចសុវត្ថិភាពអ្នកជំងឺ (Advance Leadership and Governance in Patient Safety)
៣) សមាហរណកម្មសុវត្ថិភាពអ្នកជំងឺទៅក្នុងការត្រៀមសម្រាប់គ្រោះមហន្តរាយ និងការសង្គ្រោះបន្ទាន់ និងភាពធន់នឹងអាកាសធាតុ (Integrate Patient Safety into Disaster and Emergency Preparedness and Climate Resilience) និង
៤) បង្កើតអភិក្រមផ្តោតលើមនុស្ស ដើម្បីសុវត្ថិភាពអ្នកជំងឺ (Build a People-Centered Approach to Patient Safety)។ បន្ថែមលើនេះ សេចក្តីថ្លែងការក៏បាន លើកទឹកចិត្តឱ្យប្រែក្លាយសេចក្តីថ្លែងការនេះជាការអនុវត្តជាក់ស្តែង និងអំពាវនាវឱ្យតួអង្គពាក់ព័ន្ធទាំងអស់ចូលរួមអនុវត្តបេសកកម្មដ៏មានសារៈសំខាន់នេះ។
នារសៀលនៃថ្ងៃទី២នេះផងដែរ ថ្នាក់ដឹកនាំជារដ្ឋមន្រ្តី អនុរដ្ឋមន្រ្តី រដ្ឋលេខាធិការ តំណាងស្ថានទូតនានា ត្រូវបានផ្តល់ឱកាស ដើម្បីធ្វើបទអន្តរាគមន៍ ផ្តល់ចំណាប់អារម្មណ៍ និងបង្ហាញពីការប្តេជ្ញាចិត្ត ក្នុងនោះ ក្រសួងសុខាភិបាលកម្ពុជា បានថ្លែងចំណុចគន្លឹះ ដោយគូសបញ្ជាក់ពីការគាំទ្រផែនការសកម្មភាពស្តីពីសុវត្ថិភាពអ្នកជំងឺជាសាកល ២០២១-២០៣០ ដែលបញ្ជាក់ពីការប្តេជ្ញាចិត្តរបស់កម្ពុជាក្នុងការផ្តល់អាទិភាពដល់ការលើកកម្ពស់សុវត្ថិភាពអ្នកជំងឺ។ ឯកឧត្តមសាស្រ្តាចារ្យ កុយ វ៉ាន់នី ក៏បានរំលេចពីវិធានការសំខាន់ៗ ដែលកម្ពុជាបាន និងកំពុងអនុវត្ត និងបន្តអភិវឌ្ឍន៍បន្ថែម ដើម្បីរួមចំណែកលើកកម្ពស់សុវត្ថិភាពអ្នកជំងឺ រួមមាន (១) ផែនទីបង្ហាញផ្លូវស្តីពីការគ្របដណ្តប់សុខភាពជាសកលនៅកម្ពុជា ២០២៤-២០៣៥ (២) ការវាស់វែងតាមរយៈស្តង់ដាទទួលស្គាល់គុណភាពមន្ទីរពេទ្យ (៣) ស្តង់ដាចាំបាច់សំរាប់សេវាឯកជន និង (៤) កិច្ចសហការជាមួយគណៈវិជ្ជាជីវៈសុខាភិបាល និងតួអង្គពាក់ពន្ធ័សុខាភិបាល។
