ឯកឧត្តមសាស្រ្តាចារ្យរដ្ឋមន្រ្តី បានណែនាំដល់ថ្នាក់ដឹកនាំ និងមន្រ្តីបច្ចេកទេសជំនាញ ត្រូវរៀបចំឱ្យបានល្អនូវគ្រប់ទិដ្ឋភាព ជាពិសេសការងារបច្ចេកទេសទៅតាមប្រធានបទនីមួយៗ ដើម្បីចូលរួមផ្លាស់ប្តូរបទពិសោធន៍កម្ពុជាដែលជាវឌ្ឍនភាពថ្មីៗ រួមគ្នាជាមួយថ្នាក់តំបន់ និងអន្តរជាតិ និងរួមទាំងពាំនាំយកមកវិញនូវបទពិសោធន៍ អនុសាសន៍ល្អៗមកអភិវឌ្ឍវិស័យសុខាភិបាលកម្ពុជាឱ្យកាន់តែរីកចម្រើនបន្ថែមទៀត។ មហាសន្និបាតអង្គការសុខភាពពិភពលោក ជាឱកាសជួបប្រជុំពិភាក្សារវាងបណ្តាប្រទេសជាសមាជិក ក្នុងការបង្កើនកិច្ចសហប្រតិបត្តិការ ជាផ្លូវនាំមកនូវសាមគ្គី ការរិះរកមធ្យោបាយ និងការដំណោះស្រាយវិបត្តិសុខភាពជាសកល ឬទៅតាមស្ថានភាពប្រទេសនីមួយៗ។ តាមរយៈមហាសន្និបាតអង្គការសុខភាពពិភពលោក នឹងនាំផ្លូវក្នុងការកសាងភាពធន់ក្នុងប្រព័ន្ធសុខាភិបាលកម្ពុជាឱ្យកាន់តែប្រសើរឡើង ស្របទៅតាមគោលដៅសហស្សវត្សរ៍ប្រកបដោយចីរភាព។
សូមជម្រាបជូនថា មហាសន្និបាតអង្គការសុខភាពពិភពលោក រៀបចំឡើងនៅសប្តាហ៍ទី៣ ឬ ទី៤ នៃខែឧសភា ជារៀងរាល់ឆ្នាំ។
រាជធានីភ្នំពេញ៖ ទីស្តីការក្រសួងសុខាភិបាល ព្រឹកថ្ងៃអង្គារ ទី១៣ ខែឧសភា ឆ្នាំ២០២៥
