ខេត្តកំពង់ធំ ចាប់ពីថ្ងៃទី២ ដល់ថ្ងៃ ទី៣ ខែមិថុនា ឆ្នាំ២០២៥៖ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល ទទួលបន្ទុកការងារបច្ចេកទេសសេវាសុខភាពបឋមនៅមូលដ្ឋានកម្រិតមណ្ឌលសុខភាពក្នុងខេត្តចំនួន ១៣ និងជាប្រធានក្រុមការងារអភិវឌ្ឍ និងគ្រប់គ្រងការអនុវត្តក្របខ័ណ្ឌ អនុវត្តការជំរុញបង្កើន ការថែទាំសុខភាពបឋមនៅកម្ពុជា អមដំណើដោយឯកឧត្តមវេជ្ជបណ្ឌិត នាង ភារិទ្ធ រដ្ឋលេខាធិការក្រសួងសុខាភិបាល និង ឯកឧត្តមសាស្រ្តាចារ្យ ម៉ុក ធាវី អនុរដ្ឋលេខាធិការក្រសួងសុខាភិបាល បានចុះបំពេញបេសកកម្មនៅក្នុងខេត្តកំពង់ធំ ដើម្បី៖
១) ពិនិត្យ និងពង្រឹងការងារផ្តល់សេវានៅតាមមណ្ឌលសុខភាព អនុលោមតាមសំណុំសកម្មភាពអប្បរមា សំដៅធ្វើឱ្យបានកាន់តែល្អប្រសើរឡើងនូវការផ្ដល់សេវាជូនប្រជាពលរដ្ឋ
២) ពង្រឹង ដំណើរការនៃគណៈកម្មការគ្រប់គ្រងមណ្ឌលសុខភាព (HCMC) និងលើកកម្ពស់ការយល់ដឹងរបស់ផ្នែកពាក់ព័ន្ធដើម្បីជំរុញបង្កើនការចូលរួមការអនុវត្តការថែទាំសុខភាពបឋម នៅថ្នាក់ក្រោមជាតិ
៣) ដឹកនាំកិច្ចប្រជុំផ្សព្វផ្សាយ ជំរុញការចូលរួមពីផ្នែកពាក់ព័ន្ធក្នុងការអនុវត្ត “ផែនការឆ្នាំ២០២៥ ដើម្បីជំរុញបង្កើនការថែទាំសុខភាពបឋម និងការកែលម្អគុណភាពសេវាមណ្ឌលសុខភាព” នៅក្នុងខេត្តកំពង់ធំ។
នៅក្នុងដំណើរបេសកកម្មនេះ លោកជំទាវ និងក្រុមការងារបានចុះពិនិត្យ និងណែនាំជំរុញការកែលម្អមណ្ឌលសុខភាពចំនួន 20 កន្លែងនៅក្នុងខេត្តកំពង់ធំ ក្នុងនោះមាន៖
-ការិយាល័យសុខាភិបាលស្រុកប្រតិបត្តិកំពង់ធំ៖ មណ្ឌលសុខភាពសានគរ ព្រៃគុយ កំពង់ធំ ស្រយ៉ូវ ដំរីជាន់ខ្លា កកោះ ត្បូងក្រពើ អាចារ្យលាក់ និងមណ្ឌលសុខភាពកំពង់ស្វាយ
-ការិយាល័យសុខាភិបាលស្រុកប្រតិបត្តិបារាយណ៍សន្ទុក៖ មណ្ឌលសុខភាពគ្រើល ប្រាសាទ បារាយណ៍ ឈូកខ្សាច់ បឹង ចុងដូង ត្នោតជុំ គគីរធំ ក្រវ៉ា ចើងជើង និងមណ្ឌលសុខភាពបល្ល័ង្គ។
