ឯកឧត្តមសាស្រាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានអញ្ជើញចុះពិនិត្យវឌ្ឍនភាពការសាងសង់អគារមជ្ឈមណ្ឌលកណ្តាល អគារចំណត និងអគារមជ្ឈមណ្ឌលវេជ្ជសាស្ត្រស៊ីក្លូត្រុង នៃមន្ទីរពេទ្យកាល់ម៉ែត ដែលកំពុងដំណើរការយ៉ាងមមាញឹក។ បន្ថែមពីនេះ ឯកឧត្តមសាស្រ្តាចារ្យរដ្ឋមន្រ្តី បានចុះឆ្លៀតសួរសុខទុក្ខ និងសំណេះសំណាលជាមួយមន្រ្តី បុគ្គលិកសុខាភិបាលដែលកំពុងបម្រើការងារនៅតាមផ្នែកមួយចំនួន នៃមន្ទីរពេទ្យកាល់ម៉ែត។
ជាមួយគ្នានេះ ឯកឧត្តមសាស្រ្តាចារ្យរដ្ឋមន្រ្តី បានជួបសំណេះសំណាល និងសួរសុខទុក្ខជាមួយក្រុមគ្រួសារអ្នកជំងឺ ក្នុងការស្វែងយល់អំពីស្ថានភាពជាក់ស្តែង និងទទួលបានមតិត្រឡប់ ពីប្រជាពលរដ្ឋដែលមកទទួលសេវាសុខាភិបាលនៅមន្ទីរពេទ្យកាល់ម៉ែត ក៏ដូចជាក្នុងវិស័យសុខាភិបាលទាំងមូល ក្នុងន័យ ដើម្បីពង្រឹងបន្ថែមនូវគុណភាពនៃការបម្រើសេវា ឱ្យកាន់តែមានគុណភាព ប្រសិទ្ធភាព ស័ក្កិសិទ្ធភាព និងក្រមសីលធម៌វិជ្ជាជីវៈ ដោយសមធម៌មិនមានការរើសអើង។
រាជធានីភ្នំពេញ៖ ព្រឹកថ្ងៃសុក្រ ១១កើត ខែជេស្ឋ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី៦ ខែមិថុនា ឆ្នាំ២០២៥
