ការចុះពង្រឹង និងជួយធ្វេីឱ្យប្រសេីរឡេីង នៃការស្រាវជ្រាវធ្វេីរោគវិនិច្ឆ័យជំងឺរបេងជាពិសេសជំងឺរបេងកុមារ
September 14, 2024
ខេត្តកណ្តាល ៖ នៅសប្ដាហ៍ទី២ ចាប់ពីថ្ងៃទី១០ ដល់ថ្ងៃទី១៤ ខែកញ្ញា ឆ្នាំ២០២៤ ដោយយោងតាមអនុសាសន៍ដ៏ខ្ពង់ខ្ពស់ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល លោកជំទាវវេជ្ជបណ្ឌិត ព្រុំ ឆោមសាយឿន ទីប្រឹក្សាក្រសួងសុខាភិបាល ព្រមទាំងក្រុមការងារ និងដោយមានការសហការពីលោកវេជ្ជបណ្ឌិត ហួត ចាន់យុដា នាយកមជ្ឈមណ្ឌលជាតិកំចាត់រោគរបេង និងហង់សិន បានចុះបំពេញការងារនៅមន្ទីរពេទ្យបង្អែកស្រុក អង្គស្នួល មន្ទីរពេទ្យបង្អែកស្រុក ពញាឮ និងមន្ទីរពេទ្យតេជោសែនកោះធំ ស្រុកប្រតិបត្តិ កោះធំ នៃខេត្តកណ្តាល។
គោលបំណង នៃការចុះពង្រឹងការងារ គឺដើម្បីធ្វេីឱ្យប្រសេីរឡេីងនៃការធ្វេីរោគវិនិច្ឆ័យ ជំងឺរបេងកុមារ ដែលទាក់ទងនឹង៖
- ការធ្វេីរោគវិនិច្ឆ័យច្រេីនលេីសលប់ (Over diagnosis) ដោយផ្អែកលេីទិន្នន័យជំងឺរបេងកុមារធៀបជាមួយជំងឺរបេងគ្រប់សណ្ឋានដែលបានចុះបញ្ជីក្នុងឆ្នាំ២០២៣ និង២ត្រីមាស ដេីមឆ្នាំ២០២៤ ដែលវិធីសាស្រ្ត នៃការកែលម្អគឺ ក្រុមការងារបានប្រមូលកុមារដែលរស់នៅជិតស្និទ្ធជាមួយអ្នកជំងឺរបេងសួតវិជ្ជមានបេកា ឱ្យមកមន្ទីរពេទ្យបង្អែក ក្នុងគោលបំណង៖
- ពិនិត្យកុមារដេីម្បីធ្វេីរោគវិនិច្ឆ័យ និងព្យាបាលតាមនីតិវិធី នៃសេចក្តីណែនាំថ្នាក់ជាតិ ស្តីពីការស្រាវជ្រាវ ការធ្វេីរោគវិនិច្ឆ័យ និងការព្យាបាលជំងឺរបេងកុមារ។
- បានបង្រៀននៅនឹងកន្លែងនូវរបៀបនៃការស្ទាបរកកូនកណ្តុររីកធំនៅផ្នែកខាងក្រៅនៃក ដែលជំរុញឱ្យគិតខ្លាំងដល់ជំងឺរបេងកូនកណ្តុរកុមារ ដល់គ្រូពេទ្យទាំងអស់ដែលពាក់ព័ន្ធ ដេីម្បីជំរុញការធ្វេីរោគវិនិច្ឆ័យជំងឺរបេងកូនកណ្តុរឱ្យកាន់តែមានភាពសុក្រិត្យ។
- ធ្វេីឱ្យមានការកេីនឡេីងនូវការរកឃេីញជំងឺរបេងសួតកុមារនៅកម្ពុជា ដោយផ្តល់អនុសាសន៍ គ្រប់កុមារទាំងអស់ដែលធ្វេីរោគវិនិច្ឆ័យជាជំងឺរបេង ត្រូវតែថតសួត (តាមរបាយការណ៍នៃអង្គការសុខភាពពិភពលោក ៧៥% នៃជំងឺរបេងកុមារ គឺជាជំងឺរបេងសួត ដែលផ្ទុយទៅវិញ នៅប្រទេសកម្ពុជាការរកឃេីញជំងឺរបេងសួតកុមារបានត្រឹម ៥ទៅ ១០% ប៉ុណ្ណោះ)
- បានបង្រៀនជាទ្រឹស្ដីនូវមេរៀនទាក់ទងជំងឺរបេងកុមារ
- បានបង្រៀននូវការអានហ្វីលទាក់ទងជំងឺរបេងកុមារដល់គ្រូពេទ្យទាំងអស់ដែលពាក់ព័ន្ធ
- បានចូលជួយពិនិត្យ និងពិភាក្សាអ្នកជំងឺសម្រាកពេទ្យដែលពិបាកធ្វេីរោគវិនិច្ឆ័យ
- បានផ្ដល់នូវវិធីសាស្ត្រក្នុងការជួយព្យាបាលផលរំខាននៃថ្នាំរបេង។
- បានផ្តល់នូវវិធីសាស្ត្រ និងលក្ខខណ្ឌនៃការព្យាបាលបង្ការ (TPT) ដល់កុមារអាយុក្រោម១៥ឆ្នាំ ប្រាកដជាមានសុខភាពល្អ និងដែលរស់នៅជិតស្និទ្ធជាមួយអ្នកជម្ងឺរបេងសួតវិជ្ជមានបេកា ផងដែរ។
ជាលទ្ធផល កុមារដែលរស់នៅជិតស្និទ្ធជាមួយអ្នកជំងឺរបេងសួតវិជ្ជមានបេកាមកកាន់មន្ទីរពេទ្យបង្អែកទាំង៣ ស្រុកប្រតិបត្តិសរុបចំនួន៥៤នាក់ ក្នុងនោះមាន៖
- រកឃេីញជំងឺរបេងកុមារដែលត្រូវព្យាបាលចំនួន ៥នាក់ ជារបេងកូនកណ្តុរ ក្នុងនោះពុំមានមានរបេងសួតគ្លីនិកកុមារទេ(ក្រោយពីបានពិនិត្យរូបភាពថតសួតរួច)
- ដាក់ឱ្យព្យាបាលបង្ការជម្ងឺរបេងចំនួន ៤នាក់
- កុមារស្ថិតក្នុងការតាមដាន ចំនួន ១៣នាក់
- កុមារដែលពុំមានរោគសញ្ញាសង្ស័យរបេង ៣៦ នាក់
- គ្រូពេទ្យ និងគិលានុបដ្ឋាកដែលពាក់ព័ន្ធយកចិត្តទុកដាក់ស្តាប់នូវបទបង្ហាញបានយល់ និងអាចធ្វេីរោគវិនិច្ឆ័យជំងឺរបេងកុមារឱ្យកាន់តែប្រសេីរឡេីង និងមានភាពសុក្រិត្យ។
