ការចុះពង្រឹងគុណភាពសេវាសាធារណៈនៅមន្ទីរពេទ្យបង្អែកស្រុក
October 10, 2024
ខេត្តកំពង់ឆ្នាំង៖ ថ្ងៃទី១០ ខែតុលា ឆ្នាំ២០២៤ ដោយទទួលបានការអនុញ្ញាតដ៏ខ្ពង់ខ្ពស់ពីឯកឧត្ដមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ឯកឧត្តមឱសថការី អ៊ូ វិភព រដ្ឋលេខាធិការ រួមជាមួយឯកឧត្តមសាស្ត្រាចារ្យជំនួយ ហេង សុទ្ធី អនុរដ្ឋលេខាធិការ បានចុះទៅពិនិត្យនិងពង្រឹងគុណភាពសេវាមន្ទីរពេទ្យបង្អែកស្រុកចំនួន២ នៃមន្ទីរសុខាភិបាលនៃរដ្ឋបាលខេត្តកំពង់ឆ្នាំងមានដូចជា មន្ទីរពេទ្យបង្អែកបរិបូណ៍ និងមន្ទីរពេទ្យបង្អែកកំពង់ត្រឡាច។
ការចុះពិនិត្យនេះ ធ្វេីឡេីងដេីម្បីជួយគាំទ្រជម្រុញលេីកទឹកចិត្ត និងពង្រឹងការផ្តល់សេវាព្យាបាលប្រកបដោយប្រសិទ្ធភាពខ្ពស់ ដែលផ្តោតសំខាន់លើ៧ចំណុចរួមមាន៖
1- ហេដ្ឋារចនាសម្ព័ន្ធ
2- ធនធានមនុស្ស
3- សេវាគ្លីនិក (សង្គ្រោះបន្ទាន់,បន្ទប់ថតឆ្លុះ,មន្ទីរពិសោធន៍,បន្ទប់វះកាត់ និងបន្ទប់ឆ្លងទន្លេ ព្រមទាំងផ្នែកទន្តសាស្ត្រ បើមាន)
4- ឧបករណ៍ បរិក្ខារ និងឱសថ
5- ការបង្ការ និងការត្រួតពិនិត្យការចម្លងរោគ
6- ការលើកកម្ពស់គុណភាពសេវា
7- លក្ខខណ្ឌច្បាប់ និងរដ្ឋបាល។
នាក្នុងឱកាសនោះ ឯកឧត្ដមក៏បានពាំនាំនូវការផ្តាំផ្ញើសួរសុខទុក្ខពីឯកឧត្ដមសាស្ត្រាចារ្យរដ្ឋមន្ត្រីក្រសួងសុខាភិបាល ព្រមទាំងថ្លែងអំណរគុណដល់មន្ត្រីសុខាភិបាលទាំងអស់ដែលបានខិតខំប្រឹងប្រែងបម្រើសេវាថែទាំ និងព្យាបាលអ្នកជំងឺជូនប្រជាពលរដ្ឋនៅក្នុងមូលដ្ឋានផងដែរ។
