រាជធានីភ្នំពេញ៖ នាព្រឹកថ្ងៃអង្គារ ១៤កើត ខែមាឃ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១១ ខែកុម្ភៈ ឆ្នាំ២០២៥ ដោយទទួលបានអនុសាសន៍ដ៏ខ្ពង់ខ្ពស់ពី ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល ឯកឧត្តមទន្តបណ្ឌិត អឿន បូរារ័ត្នន៍ រដ្ឋលេខាធិការក្រសួងសុខាភិបាល រួមជាមួយ ឯកឧត្តមវេជ្ជបណ្ឌិត ជូ ម៉េងចាន់ អនុរដ្ឋលេខាធិការក្រសួងសុខាភិបាល បានដឹកនាំកិច្ចប្រជុំ ពិនិត្យលើវឌ្ឍនភាពការងារ និងការលើកទិសដៅបន្ត របស់ការិយាល័យសុខភាពមាត់ធ្មេញ នៃនាយកដ្ឋានការពារសុខភាព ដើម្បីពិនិត្យ និងពង្រឹងតាមដានការអនុវត្តកម្មវិធីសុខភាពមាត់-ធ្មេញ នៅគ្រប់មូលដ្ឋានសុខាភិបាលរាជធានី-ខេត្ត។
គោលបំណងនៃកិច្ចប្រជុំផ្តោតសំខាន់ដូចខាងក្រោម៖
១. រៀបចំផែនការសកម្មភាពសម្រាប់អនុវត្តឆ្នាំ២០២៥
២. បន្តការងារអប់រំផ្សព្វផ្សាយ និងការបង្ការជំងឺមាត់-ធ្មេញ នៅតាមមូលដ្ឋានសុខាភិបាល សាលារៀន សហគមន៍
៣. វឌ្ឍនភាពការងារកែសម្រួលសេចក្តីណែនាំ ស្តីពីសំណុំសកម្មភាពបង្គ្រប់ សម្រាប់អភិវឌ្ឍន៍មន្ទីរពេទ្យបង្អែក និងប្រព័ន្ធព័ត៌មានសុខាភិបាល លើផ្នែកសុខភាពមាត់-ធ្មេញ
៤. វឌ្ឍនភាពការងារបច្ចេកទេសមគ្គទេសក៍គ្លីនិកទន្តវទនសាស្ត្រ
៥. រៀបចំពង្រឹងទំនាក់ទំនងជាមួយមន្ត្រីបង្គោលសុខភាពមាត់ធ្មេញនៅតាមបណ្តារាជធានី-ខេត្ត។
កិច្ចប្រជុំនេះមានការអញ្ជើញចូលរួមពី លោកវេជ្ជបណ្ឌិត ភូ លាង អគ្គនាយករងបច្ចេកទេសសុខាភិបាល លោកស្រីទន្តបណ្ឌិតអនុបណ្ឌិត ហ៊ូ សុគន្ធារី ប្រធានស្តីទីការិយាល័យសុខភាពមាត់-ធ្មេញ និងមន្ត្រីជំនាញការិយាល័យសុខភាពមាត់-ធ្មេញ នៃនាយកដ្ឋានការពារសុខភាពផងដែរ៕
