ខេត្តសៀមរាប៖ ដោយទទួលបានការណែនាំដ៏ខ្ពង់ខ្ពស់ពី ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ព្រមទាំងទទួលបានការចង្អុលបង្ហាញពី ឯកឧត្តមសាស្ត្រាចារ្យ កុយ វ៉ាន់នី រដ្ឋលេខាធិការក្រសួងសុខាភិបាល និងលោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល ចាប់ពីថ្ងៃទី១៨ ដល់ថ្ងៃទី២២ ខែកុម្ភៈ ឆ្នាំ២០២៥ ឯកឧត្ដមវេជ្ជបណ្ឌិត នាង ភារិទ្ធ រដ្ឋលេខាធិការក្រសួងសុខាភិបាល បានអញ្ជើញចុះពិនិត្យមណ្ឌលសុខភាពនៅខេត្តសៀមរាប។
ការចុះពិនិត្យនេះ ធ្វើឡើងដើម្បីជួយគាំទ្រជំរុញលើកទឹកចិត្ត និងពង្រឹងការផ្តល់សេវាពិនិត្យព្យាបាលថែទាំជូនប្រជាពលរដ្ឋនៅក្នុងមូលដ្ឋានប្រកបដោយប្រសិទ្ធភាពខ្ពស់ ស័ក្តិសិទ្ធភាព និងសមធម៌ ដោយផ្តោតលើចំណុចសំខាន់ៗដូចជា៖
១. ហេដ្ឋារចនាសម្ព័ន្ធបរិស្ថានក្នុង និងជុំវិញមណ្ឌលសុខភាព
២. ពង្រឹងសមត្ថភាពបុគ្គលិក ការគ្រប់គ្រងធនធានមនុស្ស
៣. ការគ្រប់គ្រងឱសថ វ៉ាក់សាំង និងការថែទាំសម្ភារៈបរិក្ខារពេទ្យ
៤. ការបដិសណ្ឋារកិច្ចក្នុងការផ្ដល់សេវា
៥. ការបំពេញការងារ ការប្រចាំការ និងការបម្រើសេវា២៤ម៉ោង/២៤ម៉ោង ៧ថ្ងៃ/សប្ដាហ៍
៦. ការបណ្តុះបណ្តាលបន្ថែមលើបច្ចេកទេស និងប្រព័ន្ធឌីជីថល
៧. ការលើកកម្ពស់សេវាបញ្ជូន និងប្រព័ន្ធទំនាក់ទំនង។
ជាចុងក្រោយ ឯកឧត្ដម នាង ភារិទ្ធ ក៏បានពាំនាំនូវការផ្តាំផ្ញើសួរសុខទុក្ខ ពីឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ព្រមទាំងថ្លែងអំណរគុណដល់មន្រ្តីសុខាភិបាលទាំងអស់ដែលបានខិតខំបម្រើសេវាថែទាំ និងព្យាបាលជំងឺជូនប្រជាពលរដ្ឋហើយសូមបង្កើនការខិតខំបន្តទៀត។
គួរបញ្ជាក់ផងដែរថា ការចុះត្រួតពិនិត្យនេះមានការសម្របសម្រួលពីមន្ត្រីមន្ទីរសុខាភិបាលនៃរដ្ឋបាលខេត្តព្រមទាំងមន្ត្រីការិយាល័យស្រុកប្រតិបត្តិដែលបានចុះទៅមណ្ឌលសុខភាពមួយចំនួនមានដូចជា មណ្ឌលសុខភាពកន្ទ្រាំង មណ្ឌលសុខភាពល្វែងឬស្សី មណ្ឌលសុខភាពកំពង់ក្តី មណ្ឌលសុខភាពគោកធ្លោកក្រោម មណ្ឌលសុខភាពខ្ចាស់ មណ្ឌលសុខភាពបាល័្លង្គ មណ្ឌលសុខភាពត្រពាំងធំ មណ្ឌលសុខភាពកំពង់ភ្លុក មណ្ឌលសុខភាពរំចេក មណ្ឌលសុខភាពអំពិល។
