ខេត្តបន្ទាយមានជ័យ៖ នៅថ្ងៃទី១១ ដល់ថ្ងៃទី១៥ ខែមីនា ឆ្នាំ២០២៥ ដោយទទួលបានការអនុញ្ញាត និងណែនាំដ៏ខ្ពង់ខ្ពស់ពី ឯកឧត្ដមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ព្រមទាំងទទួលបានការចង្អុលបង្ហាញពី លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល ឯកឧត្ដមវេជ្ជបណ្ឌិត នាង ភារិទ្ធ រដ្ឋលេខាធិការក្រសួងសុខាភិបាលបានចុះពិនិត្យមណ្ឌលសុខភាពចំនួន៧ និងប៉ុស្តិ៍សុខភាពចំនួន១ ក្នុងខេត្តបន្ទាយមានជ័យ ដែលមានការចូលរួមសម្របសម្រួលពីលោកប្រធាន អនុប្រធានមន្ទីសុខាភិបាលនៃរដ្ឋបាលខេត្តបន្ទាយមានជ័យ ព្រមទាំងមន្ត្រីការិយាល័យស្រុកប្រតិបត្តិ។
ការចុះពិនិត្យនេះធ្វើឡើងដើម្បីជួយគាំទ្រ ជំរុញលើកទឹកចិត្តនិងពង្រឹងមណ្ឌលសុខភាពក្នុងការផ្តល់សេវាថែទាំនិងព្យាបាលប្រកបដោយប្រសិទ្ធិភាពខ្ពស់ និងសមធម៌ ដោយផ្តោតទៅលើចំនុចសំខាន់ៗដូចជា៖
១. ហេដ្ឋារចនាសម្ព័ន្ធ បរិស្ថានជុំវិញមណ្ឌលសុខភាព
២. ការពង្រឹងសមត្ថភាពបុគ្គលិកនិងការគ្រប់គ្រងធនធានមនុស្ស
៣. ការគ្រប់គ្រង ការចែកចាយឱសថ វ៉ាក់សាំង និងការថែទាំបរិក្ខារពេទ្យ
៤. ការបដិសណ្ឋារកិច្ចក្នុងការផ្តល់សេវា ថែទាំដល់អ្នកជំងឺ
៥. ការបំពេញការងារ ប្រចាំការនិងប្រើសេវា ២៤ម៉ោង/២៤ម៉ោង ៧ថ្ងៃ/សប្តាហ៍
៦. ការលើកកម្ពស់គុណភាព សុវត្ថិភាពអ្នកជំងឺ ពិសេសមធ្យោយសេវាបញ្ជូននិងប្រព័ន្ធទំនាក់ទំនង
៧. ការបណ្តុះបណ្តាលបន្ថែមលើបច្ចេកទេសនិងប្រព័ន្ធឌីជីថល។
ជាចុងក្រោយឯកឧត្តមវេជ្ជបណ្ឌិត នាង ភារិទ្ធ ក៏បានពាំនាំនូវការផ្តាំផ្ញើសួរសុខទុក្ខពីឯឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ព្រមទាំងថ្លែងអំណរគុណដល់មន្ត្រីសុខាភិបាលទាំងអស់ដែលបានខិតខំបម្រើសេវាថែទាំនិងព្យាបាលជំងឺជូនប្រជាពលរដ្ឋក្នុងមូលដ្ឋាន។
គួរបញ្ជាក់ផងដែរថាមណ្ឌលសុខភាពនិងប៉ុស្តិ៍សុខភាពដែលបានចុះពិនិត្យមានដូចជា មណ្ឌលសុខភាពសិលាខ្មែរ មណ្ឌលសុខភាពអូរឫស្សី១ មណ្ឌលសុខភាពអូរឫស្សី២ មណ្ឌលសុខភាពអូរបីជាន់ មណ្ឌលសុខភាពផ្សារកណ្តាល មណ្ឌលសុខភាពបល្ល័ង្គ មណ្ឌលសុខភាពបឹងបេង និងប៉ុសិ៍តសុខភាពថ្មបាំង។
