រាជធានីភ្នំពេញ៖ នៅរសៀលថ្ងៃពុធ ១៣រោច ខែផល្គុន ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៦ ខែមីនា ឆ្នាំ២០២៥ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល លោកជំទាវសាស្ត្រាចារ្យ អ៉ឹម សិទ្ធិការ្យ រដ្ឋលេខាធិការក្រសួងសុខាភិបាល និងជាប្រធានគណៈកម្មការសម្របសម្រួលក្នុងការពង្រឹងគុណភាពថែទាំ ព្យាបាល សុខមាលភាព មាតា ទារក កុមារ និងរោគស្ត្រី បានដឹកនាំកិច្ចប្រជុំ នៅមន្ទីរពេទ្យកាលម៉ែត ដែលមានអ្នកចូលរួមផ្ទាល់ចំនួន ៣១នាក់ និងតាមរយៈប្រព័ន្ធនិម្មិតចំនួន ២០នាក់ សរុប ៥១នាក់។
គោលបំណងនៃកិច្ចប្រជុំគឺ ពិនិត្យមើលការងារជាអាទិភាពទាំង៥ចំណុចដែលបានសម្រេចក្នុងសន្និបាតក្រសួងសុខាភិបាល ដើម្បីកាត់បន្ថយអត្រាមរណភាពមាតា និងទារកក្នុងប្រទេសកម្ពុជាឱ្យកាន់តែមានប្រសិទ្ធភាពខ្ពស់។
កិច្ចប្រជុំបានធ្វើបទបង្ហាញ និងវឌ្ឍនភាពការងារ ក្នុងការពង្រឹងគុណភាពថែទាំ ព្យាបាល សុខមាលភាពមាតា ទារក កុមារ និងរោគស្ត្រីដូចជា៖ ទី១. គាំទ្រលើការពង្រឹងសមត្ថភាព គុណភាពនៃការថែទាំតាមការការណែនាំអំពីការថែទាំពេលឈឺពោះ (Labour Care Guide) យោងលើអង្គការសុខភាពពិភពលោក ទី២. វឌ្ឍនភាពស្តីពី ការតាមដាន និងការឆ្លើយតបចំពោះ មរណភាពមាតា និងទារកជុំវិញកំណើត(MPDSR) សម្រេចបានការបណ្តុះបណ្តាលគ្រូបង្គោលចំនួន ១៧នាក់ ដើម្បីពង្រឹងគុណភាពនៃការថែទាំងរបស់បុគ្កលិកសុខាភិបាលចំពោះស្រ្តីមានផ្ទៃពោះ ពេលឈឺពោះ ក្រោយសម្រាល និងការស្រាវជ្រាវរកមូលហេតុស្លាប់ ទី៣. ពិភាក្សាពីការរៀបចំកម្រិតនៃការថែទាំនិងសង្គ្រោះទារកតាមមន្ទីរពេទ្យបង្អែកកម្រិត១ និងកម្រិត២ ។
សូមបញ្ជាក់ កិច្ចប្រជុំមានការអញ្ជើញចូលរួមដោយលោកជំទាវ អនុរដ្ឋលេខាធិការ លោកជំទាវទីប្រឹក្សាក្រសួងសុខាភិបាល នាយកដ្ឋានចំណុះក្រសួងសុខាភិបាល គណៈវិជ្ជាជីវៈឆ្មប មន្ទីរពេទ្យថ្នាក់ជាតិ មន្ទីរពេទ្យថ្នាក់ខេត្ត អង្គការដៃគូអភិវឌ្ឍន៍រួមមាន UNFPA. WHO, JICA, KOFIR, A&T/Fhi360។
