រាជធានីភ្នំពេញ៖ ថ្ងៃសុក្រ ៦កើត ខែពិសាខ ឆ្នាំម្សាញ់ សប្តស័ក ព.ស.២៥៦៨ ត្រូវនឹងថ្ងៃទី២ ខែឧសភា ឆ្នាំ២០២៥ ដោយមានការអនុញ្ញាតពី ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល លោកជំទាវវេជ្ជបណ្ឌិត ប្រាក់ សោភ័ណនារី រដ្ឋលេខាធិការក្រសួងសុខាភិបាល បានអញ្ជើញជាអធិបតីបើកក្នុងទិវាអនាម័យដៃពិភពលោក ក្រោមប្រធានបទ “ពេលខ្លះយើងប្រើស្រោមដៃ ប៉ុន្តែត្រូវធ្វើអនាម័យដៃគ្រប់ពេល” នៅមជ្ឈមណ្ឌលសហប្រតិបត្តិការកម្ពុជា-កូរ៉េ ដែលរៀបចំ នាយកដ្ឋានមន្ទីរពេទ្យ នៃក្រសួងសុខាភិបាល។
ទិវាអនាម័យដៃពិភពលោក មានគោលបំណង៖
១) លើកកម្ពស់ការអនុវត្តអនាម័យដៃឱ្យល្អប្រសើរ (ដោយប្រើបច្ចេកទេសសមស្រប និងយោងតាម WHO 5 Moments) និងពេលវេលាសម្រាប់ការប្រើប្រាស់ស្រោមដៃសមស្របនៅក្នុងដំណើរការការងារថែទាំសុខភាព
២) លើកកម្ពស់ការដាក់បញ្ចូលអនាម័យដៃនៅក្នុងយុទ្ធសាស្ត្រជាតិរបស់ IPC ក៏ដូចជានីតិវិធីប្រតិបត្តិស្តង់ដា (SOPs) នៅមូលដ្ឋានសុខាភិបាល ដោយអនុវត្តតាមអនុសាសន៍របស់ផែនការសកម្មភាពសកល និងក្របខណ្ឌត្រួតពិនិត្យ ២០២៤-២០៣០ របស់អង្គការសុខភាពពិភពលោក
៣) លើកកម្ពស់ការយល់ដឹងអំពីការប្រើប្រាស់ស្រោមដៃមិនចាំបាច់ដែលប៉ះពាល់ដល់បរិស្ថាន និងអាកាសជាពិសេសការបោះចោលសំណល់ស្រោមដៃ។
ឆ្លៀតក្នុងឱកាសនេះ លោកជំទាវរដ្ឋលេខាធិការ បានផ្តល់អនុសាសន៍ និងជំរុញឱ្យមូលដ្ឋានសុខាភិបាលទាំងអស់ សូមបន្តសកម្មភាពដូចតទៅ៖
១) បន្តការអប់រំ និងបណ្តុះបណ្តាលបុគ្គលិកអោយអនុវត្តអនាម័យដៃឱ្យបានត្រឹមត្រូវ
២) ផ្ដល់បរិក្ខារប្រកបដោយគុណភាព ដូចជា ទឹកសាប៊ូ និងជែលអាល់កុលឱ្យបានគ្រប់គ្រាន់
៣) រៀបចំផែនការសកម្មភាពឱ្យមានថវិកាគ្រប់គ្រាន់សម្រាប់មន្ទីរពេទ្យនីមួយៗមានសម្ភារអនាម័យដៃគ្រប់គ្រាន់
៤) ផ្តល់ព័ត៌មានត្រឡប់ជាលក្ខណៈបុគ្គលចំពោះនរណាមិនបានធ្វើអនាម័យដៃ
៥) ជំរុញការតាមដាន និងវាយតម្លៃការធ្វើអនាម័យដៃឱ្យតឹងរ៉ឹង
៦) ជំរុញភាពជាអ្នកដឹកនាំ ថ្នាក់ដឹកនាំ ប្រធានផ្នែកគ្លីនិកធ្វើជាគំរូល្អដល់បុគ្គលិកក្រោមឱវាទ។
ជាកិច្ចបញ្ចប់លោកជំទាវរដ្ឋលេខាធិការ បានថ្លែងអំណរគុណយ៉ាងជ្រាលជ្រៅចំពោះអង្គការសុខភាពពិភពលោក ដៃគូរអភិវឌ្ឍន៍នានា និងបុគ្គលិកសុខាភិបាលទាំងអស់ ដែលបានខិតខំប្រឹងប្រែងរក្សាឱ្យប្រជាពលរដ្ឋ មានសុខភាពល្អ រស់នៅក្នុងបរិស្ថានស្អាត និងមានសុវត្ថិភាព។
សូមជម្រាបផងដែរថា ទិវាអនាម័យដៃពិភពលោក មានសភាពចូលរួមសរុបចំនួន ១៨៩ នាក់ ដែលអញ្ជើញមកពីគណៈវិជ្ជាជីវៈសុខាភិបាលទាំង៥ រួមមាន៖ គណៈគ្រូពេទ្យ គណៈទន្តពេទ្យ គណៈឱសថការី គណៈគិលានុបដ្ឋាក និងគណៈឆ្មប ព្រមទាំងអង្គការដៃគូផងដែរ។
